Pulverschnee war ned zu erwartn aber d’Sonn had an ganzen Tag gscheint. 10 Bergfreind ham se mit Tourenski auf’n Steinbergstein in de “Kitzbüheler” aufgmacht. Start war beim Gasthaus Wegscheid, ganz hint im “Kurzn Grund” wo da Wirt glei in da Fria gsagt had: “Parken kennts scho aber schee wars, wennz hernach auf a Suppn einakemma dad’s”. Zerst aber is bis zur Trattenbachalm auf am Forstweg, am Bach entlang, naufganga. Nach da Bachdurchquerung samma dann langsam ind Sonn kemma und nach a gloana Stärkung hamma langsam über schene weite Hänge in Richtung Gipfe g’spurt. Da had ma scho gmerkt, dass langsam auffirnt und so a Abfahrt wia im Frühling auf uns wart. Bei strahlendem Sonnenschein san alle aufm Gipfe g’standn und ham se a Brotzeit und a Gipfeschnapserl schmecka lassn. De Abfahrt war dann a Schmankerl. Firnschnee im Dezember had ma a soitn. Aber guad is ganga und Spass hamma kappt bis zum Parkplatz zruck. Dann no a Supperl, Kaffee und Kuacha oder a Hopfenkaltschale und schwups war ma wieda dahoam.
