Da letzte Punkt aufm Sommerprogramm is do . De UntadaWochTour aufs Wuidalpjoch und de Käserwand im Sudelfeudgebiet war praktisch da Sommerabschluss mid am gschmackigen Steakessen in Elbach beim Schmidwirt. D’Andrea hads ausgsuacht und plant und…. der Dog hätt ned besser sei kenna. D’Sonn had gscheint, warm wars, de Wegerl de ma ganga san warn versteckt, mancha dad sang „Schleichweg“, und natürlich warn da wenig Leid unterwegs. Da letzte Hang zum Gipfe war scho ganz sche steil, was ma an den folgenden Dog in de Oberschenkl gspürt ham. Aber unser Mittagsplatzl war genial. Auf warme Feusn samma gsessn, zwischen zwoa Gipfe mit grandiosem Ausblick nach Südn in Richtung MangfeuGebirg, Koasa, Sudlfeud….. Wer meng had is dann moi aufd Käserwand naufgraxelt oder in der andern Richtung zum Wuidalpjoch aufe gstiegn. Nach dera Mittagsrast samma auf am versteckntn Wegal in Richtung Arzmoos obeganga. Über steile Oimwiesn und den verfärbten Herstwoid is ganga, zum Arzbach und dem Hochmoor, des da dazuakead. Am Bach entlang hamma uns dann obigratscht bis zum Auto. Guad drauf, gsund, mit am mords Hunga samma dann zum Wirt gfahrn und ham uns seine Steaks und ois Nachspreis an Kaiserschmarrn schmecka lassn. Gschmeidig war‘s, a gschenkter Dog.
