Am Faschingssamstag um sechse san 5 Bergfreind in Richtung Kelchsau g’start. Ziel war de Erla-Brenn-Hüttn im “Langen Grund”. Von dort soit’s auf’n Bärentalkopf geh. Der is 2186 m hoch und es san ungefähr 1000 hm zum naufgeh. Dass in dem Jahr ned z’vui Schnee gibt is jetzt nix neis mehr. Aber scho beim Parkplatz is gnua gleng damit ma glei mit de Schi losgeh ham kenna. Über Nacht had’s a weng g’frohrn und de Aussichten für den Dag warn richtig guad, Sonn an ganzn Dag! So wars dann a. Zerst geht’s ganz gmiatlich in den “Frommgrund”. Imma an am Bach entlang bis zu am Bruckal. Ab da is dann endlich a gscheid bergauf ganga weil ganz ohne Höhenmeter geht’s in de Berg ja ned. Über ned zu steile, weite Hänge samma nauf. Mit da Zeit is’d Sonn übern Kamm rüber kemma und had uns bis nach ganz om begleit. Da war scho a Sonnencrem g’fragt. Aufm Gipfe is dann da Wind a weng ganga aber dafür war de Aussicht richtig guad. Nach a Brotzeit und rundrum Buidl macha, hamma de Felle von de Ski zong und uns fertig für de Abfahrt g’macht. Über Hänge de auf’d Ostseiten zoagt ham samma dann abe. Buifa, na klar, “Expertenbuifa” hamma gfundn. Moi a Deckel om drauf, moi hart, moi verblasn oder da wo’d Sonn hikenna had a weng an Firn oder a schwara Schnee. Aber mia warn guad drauf und hamma’s trotzdem gracha lassn und Spass kappt. Beim Hoamfahrn hads in Raubling no an Kaffee beim Dinzla gem. Rundrum a glungane Tour. Dankschee Sepp.
