Eigentlich, ja eigentlich hamma des anders geplant und an Schnee hamma scho fast nimma glabt, aber dann is ois ganz anderes kemma. Da im Berchtsgadner Land zwenig Schnee lag had da Franz aufs Meissner-Haus bei Innsbruck umbuachd. Glück kappt!!
Ganz entspannt samma am Samstag nach Igls gfahrn, und von Ellenbögen durchs Viggartal zum Meissner-Haus aufgstiegn. Bei am gmiatlichen Abend mit UNO zu zehnt und de Vorfreude aufn Powder is der Tag ausklunga. Mit leichter Bewölkung san mia am Sonntag in Richtung Morgenkogel gstart. Had aber ned lang dauert bis den Sonn rauskemma is und uns den Aufstieg durchn kniadiafn Pulverschnee versiasst had. Gmiatlich bis zur Waldgrenz aber dann had uns da Südfön opfiffa. Nachdems ganz om ziemlich blasn had und da Schnee verblasn war hamma uns de letzten Meter zum Gipfe gspart und san liabe wieda in Dieafschnee eidaucht, wieder bis zur Hüttn nunta. Mit Juhhu und Juhhä nei in Schnää. Nach a kurzen Stärkung is weida ganga Richtung Patscherkofel. Wieder gmiatlich durchn Woid und dann wieder…., na, ned Wind… Sturm vom Feinsten am Grad. Da hamma uns wirklich eistemma miassn damit a uns ned wegblasn had. Aber letztendlich samma doch guad om okemma, in da Wärmestumm kurz eikehrt und dann auf da Pistn von da Patscherkofelbahn ganz alloa bis zum Auto nunta gfahrn.
