Mit 3 Autos, besetzt mit 11 Leid, hamma uns auf’n Weg nach Flachauwinkl, ins hinterste Eck vor’m Tauerntunnel gmacht. Da had da Lurz Sepp, unser Guide, zwoa Skitouren ausgsuacht und rundrum ois organisiert. Bei da Flachau-Kapelle, glei hinter da Autobahn-Raststation Tauernalm, samma g’start. Wia fast überoi war a da wenig Schnee, aber mia ham glei de Ski oschneun kenna und san bei Sonnenschein losmarschiert. Mia warn ned de Oanzigen und so samma erst moi oana großen Gruppen nachganga in Richtung Pleißlingtal. De hama dann aba a anders Ziel kappt. Nach a bissal a Orientierung samma schee dahi g’stapft in Richtung Taferlnock, unserm Ziel. Nach ana langa Eingehphase is endlich bergauf ganga. Schließlich is der Berg ja 2376m hoch. Durch Lärchenwoid had se da Weg gschlängelt bis dann einige steilere Hänge auf uns gwart ham. Schließlich samma alle am Gipfe gstand’n. Weil da Wind aber ganz ungmiatlich pfiffa had war ma schneu wieda weg. Mit a bissal Gspia fürn Schnee und am guadn Aug hamma dann tatsächlich, a für uns überraschend, no recht guade Hänge und Rinnen mit Buifa gfundn. A gschmeidiger Auftakt.
Am Sonntag war’s “Liebeseck” ogsagt. Head se guad o, gäh? Des wars a. Obwoi da Wedabericht an ganzen Dag Woikan gmoid had, is ganz anders kemma. Ogang is wieda mit am Talhadscha, ca. 3 km lang aber recht guad für an Ratsch in da Friah. Dann samma abbong, wieder in an Lärchenwoid und da wars dann a scho blau am Himme. Schneu warn ma durche durch den liacht’n Woid und in a groß Kar eineganga. Von dort is steiler worn aber de Spur war guad zum geh. Ganz hint, kurz vorm Skidepot wars dann no a steiler Gipfehang mit teils glasiger Spur zu bewältigen. Da ham uns unsere Harscheisen guad koiffa. Bis zum Gipfe wars danach no a 1/4 Stund z’Fuaß auf am schmoia Schnee- und Felssteig. Om samma für de Plagerei dann mit a grandiosen Rundumsicht bei diafblaua Himme belohnt worn.
Scho beim Naufgeh hamma imma wieda gschaud wos am Besten zum fahrn is und…. wieda hamma Buifa gfund’n und g’schmeidige Spuren neizong. Guad obakemma samma, Spass hads gmacht und nächsts Jahr fahr ma wieda.
