Da Skikurs steht vor da Dia. Damit ma a gscheid vorbereitet san war ma letzts Wochenend am Stubaier Gletscher, soweit ma no sang ko dass des a Gletscher is. Aber dazua späda. Wia immer war ma in Kampl beim “Mariandl” unterbracht. Mim Skibus samma imma hintre gfahrn, mit tausende von Leid de des gleiche im Kopf kappt ham. Scho am Freitag Fria san a baar neigfahrn um den Schnee zum testen. Ergebnis: Auf da Pistn wars ok weil kurz davor no a weng gschneibt had. Neba da Pisten is katastrofal. Nur no überzuckerte Stoana. Da Rest vom Haufa is am Freitag aufd Nacht kemma. Samstag um Viertel nach Sechse aufsteh, Frühstück, schneu schneu zum Skibus, 35 Minuten fahrn mit vui Andere und dann no a 1/2 Stund ungefähr osteh bist ind Gondel eisteigst. Ja auffe dauerts a no a Zeitl …eiso ungefähr um Dreiviertel Neine war ma om. 2 1/2 Stund, dafür dass ma a no im Stubaital gwohnt ham, a Graus. Aber…. ois freiwillig. Oa Gruppn is mit da Melli gfahrn und had de offizielle Fortbildung gmacht. De zwoate Gruppn hat da Franz überd Pistn glotst. Dabei hams manch verzwickte skitechnische Aufgab lösen miassn, wia z.B. an “Spiegelauer Bislschwung”… hollaröduljöh.
Gar ned gfreid had uns da Zuastand vom Gletscher. An ganzen Dag san de Schneekanonen glaffa, Naturschnee war Mangelware und des Gletschereis is seit unserm letzten Bsuach so wenig worn dass da graust.
De scheena Buidl vom Samstag san koa Fake aber steun den Gletscher unter am foischen Liacht dar. Bei Sonn und strahlend blauem Himme, dazua a baar cm Neischnee, sigt ma von de graua Foisen de glei unterm Zuckerguss san wenig. Und wennst dann ind Weidn fotografierst schaut des ois “mega” aus, so wia ma heid sagt. Aber eigentlich is a Katastroph.
Am Sonntag war dann typisch Gletscherwedda. Schneetreim, Wind, koid, teils eisige Pistn und da Himme war de meiste Zeit so grau wiad Feusn. Des skitechnische Ziel von dem Wochnend hamma gschafft, fürd Gseuschaft hamma a was do und de Blessuren vom Eiskontakt san hoffentlich boid umme.
Insg’samt mias ma uns aber schneu und vui Gedanken macha ob des so weida geh kon. Um de Jahreszeit, bei dem Zuastand vom Gletscher skifahrn. A wenns um Fortbildung geht. Es muas und werd andere Lösungen gem…. mia arbatn dro!
