De Hüttn, ganz alloa für uns! De Idee is uns im Sommer kemma. Wia ma bei da Bergmess vom Taubenstein abigschaut ham auf de Oim, mit ihrem Pool und de zwoa eigenen Skilift…..
A geniale Umgebung, da konnst de Kinder alloa fahrn lassn, direkt an da Hüttn, Schneeschuah zum ausleiha und für de Hänge rundrum im Gebiet hamma an Guide. Oiso steht nix dageng. Idee kappt, organisiert und scho geht’s dahi. Am Freitag samma zu 41zigst in Kolonne neigfahrn. Des Gepäck is in an abgstoidn Anhänger kemma und dann samma zfuas oder mit Tourenski nauf. Anstrengend war der 1 ½ stündige Marsch für de Fuaßgänger und a de ersten Hänge für de Skitourengänger, vereist, hamms in sich kappt. Wia Abenteuer so san, geht’s ned glei perfekt los. Bis jeder sei Bett in da verwinkelten und koidn Hüttn gfundn had hads dauert. Dann aber, Überraschung, had der Abend doch länger dauert . Kinder ham irgendwann gschlaffa und in da Stum is da Tank für den nächsten Tag aufgfüllt worn. Guade Nacht!
Nach‘m Frühstück had da Wirt de Lift eigschoit. Direkt vor da Hüttn. Gloa und Groß ham den Puiverschnee von da Nacht glei zerpflügt. Oa Gruppn von große Mädels hat se Schneeschuah unter de Fiaß gschneud und san losmarschiert. Schaun ob a Hüttn offhad, Pech kappt, Taubenstein umrundet, glück kappt, glacht und kudert hamms, schee wars….. und moing glei wieder!
A mit den Skitourenlatten is oa Gruppn loszong. Erst moi nunterfahrn, weil mia san ja herom. Ski oschneun und los geht’s. Koid wars, diaf verschneid und wenig Spuren aber wer braucht scho a Spur beim Naufgeh, de leng ma soiba o. Da Lempersberg war obn a wenig abblasn aber im weidn Woid had se da Schnee g’sammelt, Pulver ⛷…
Nachdem alle wieda guad zruckkemma san war a de Hüttn richtig warm eikoazt. An wenns durch de oane oder andere Ritzn a wenig reizong had. Mia ham uns rund umman Ofa guad aufhoitn kenna. Und zur Feier des Tages hads zum Essen no a grillte Sau gem, im Ganzen am Spieß grillt. A Schnankerl!
Da zwoate Abend war nimma ganz so lang, de Hüttn war zwischenzeitlich warm und der Tag had Körner kost, bei Kids und bei den Großn.
Der Sonntag is mit Sonnenschein und Woikan g’start. Wobei des imma bessa worn is und ab Mittag had ma de Sonnencrem guad braucha kenna. Oana von de Lift ist leider kaputt ganga und da Mechaniker had vergeblich versuacht des zum richtn. Aber a mit oam Lift, Schlepplift natürlich, is ganga. De Kids san über Schanzen gsprunga und in Woid neigfahrn, a de Gloana. An riesen Spass hamms kappt und zum aufhean hammas scho überredn miassn.
Ach ja, de mit den Skitourenschi und de Schneeschuah warn a wieder unterwegs, aufe, abe, aufe, abe….
Aber dann wars a wieder vorbei des Wochenend. Des Gepäck hamma wieda ind Pistenraupn eigladen, mit’m Lift samma erst nauf und dann mit de Schi bis zu de Autos nuntergfahrn und dann wieda hoam, weil Dahoam hoid am scheensten is.
